खुश्बु ओली भन्छिन्- संसद जीवित हुँदाहुँदै अध्यादेशमार्फत अघि बढ्नु संसदीय अभ्यासमाथिकै हमला

राप्रपाकी प्रमुख सचेतक खुश्बु ओलीले संसद जीवित हुँदाहुँदै अध्यादेशमार्फत् सरकार अघि बढ्न खाेज्नु संसदीय अभ्यासमाथिकै गम्भीर हमला भएकाे टिप्पणी गरेकी छिन् ।मेचीप्रेस संवाददातासँग कुरा गर्दै उनले स्पष्ट ‘बहुमत भएको सरकारलाई संसद छलेर अध्यादेशको बाटो रोज्नुपर्ने कारण के हो?’ भन्दै प्रश्न गरेकी छिन् । 

‘दुईतिहाइ नजिकको सरकारले वैशाख १७ गतेका लागि संसद अधिवेशन आह्वान गरेको थियो । तर, आह्वान गरेको भोलिपल्टै त्यसलाई स्थगन गर्ने निर्णय गरियो’, उनले भनेकी छिन्,  ‘आज संवैधानिक परिषद् र सहकारीसम्बन्धी दुईवटा अध्यादेश अघि बढाइएको भनि जानकारी आएको छ । संसद जीवित हुँदाहुँदै अध्यादेशमार्फत अघि बढ्नु संसदीय अभ्यासमाथिको गम्भीर हमला हो ।’

उनले संवैधानिक परिषद्जस्तो महत्त्वपूर्ण निकाय र सहकारी क्षेत्रजस्तो जनजीवनसँग प्रत्यक्ष जोडिएको विषय संसद छल्दै अघि बढाइनु उचित अभ्यास नभएकाे प्रतिक्रिया दिइन् । उनले सरकारकाे कदमकाे विराेध गर्ने बताएकी छिन् । उनले भनिन् ‘प्रतिपक्षको हैसियतमा, संसद निष्क्रिय बनाउने यस्ता प्रवृत्तिको म कडा विरोध गर्दै संसद सशक्तीकरणको माग गर्दछु ।’