मेची उद्योग वाणिज्य संघको साधारण सभाः कागजमा उपस्थिति, बन्द सत्रमा गायव !
धुलाबारी । मेची उद्योग वाणिज्य संघको २१औँ वार्षिक साधारण सभा धुलाबारी टाउन हलमा सम्पन्न भएको छ । तर, संघका सदस्यहरुको न्यून उपस्थितिले कार्यक्रमप्रति असन्तुष्टि र आन्तरिक समस्या झल्काएको छ । करिब २ हजार १ सय १० सदस्य रहेको संघको साधारण सभामा उद्घाटन सत्रमा कागजमा ५ सय २५ जनाको उपस्थिति देखाइए पनि वास्तविक रुपमा हलका अधिकांश कुर्सी खाली देखिनुले अवस्था लाजमर्दो बनेको सहभागीहरुले बताएका छन् ।
उद्घाटन सत्रपछि सुरु भएको बन्द सत्रमा भने झन् न्यून सहभागिता देखिएको थियो । करिब ५० जना सदस्य मात्र उपस्थित रहेको जानकारी प्राप्त भएको छ । यसले संघभित्रको आन्तरिक विवाद र असन्तुष्टि चुलिँदै गएको संकेत गरेको छ । संघका एक सदस्यका अनुसार पछिल्लो समय संघभित्र बढ्दै गएको किचलोले व्यवसायीहरु साधारण सभाप्रति उदासीन बनेका हुन् ।
विशेषगरी संघका एक वरिष्ठ कर्मचारीको अत्यधिक हस्तक्षेप र हालीमुहाली बढ्दै जाँदा व्यापारीहरु असन्तुष्ट बनेको आरोप लागिरहेको छ । निर्णय प्रक्रियामा पारदर्शिता र सहभागिताको अभाव महसुस भएपछि धेरै सदस्यहरुले कार्यक्रममा उपस्थिति जनाउन इच्छुक नदेखिएको स्रोतको भनाइ छ ।
साधारण सभा जस्तो महत्वपूर्ण कार्यक्रममा सदस्यहरुको यस्तो न्यून उपस्थिति हुनु संघको नेतृत्व र व्यवस्थापन माथि प्रश्न उठाउने विषय बनेको छ । व्यवसायीहरुले संघभित्रको विवाद समाधान गरी विश्वासको वातावरण सिर्जना गर्नुपर्ने आवश्यकता औँल्याएका छन् ।
