मेचीनगरमा जेसीज सप्ताहको रौनक, साताव्यापी सामाजिक कार्यक्रम घोषणा
मेचीनगर, जेठ ११ : ले गणतन्त्र दिवसको अवसर पारेर जेठ १५ देखि २३ गतेसम्म सञ्चालन हुने ‘जेसीज विक’ अन्तर्गत विभिन्न सामाजिक तथा जनचेतनामूलक कार्यक्रम सार्वजनिक गरेको छ । सोमबार काँकरभिट्टामा आयोजित पत्रकार सम्मेलनमार्फत सप्ताहव्यापी कार्यक्रम घोषणा गरिएको हो ।
संस्थाकी अध्यक्ष रीता प्रधानका अनुसार सप्ताहको उद्घाटन युवाको स्वास्थ्य प्रवर्द्धन गर्ने उद्देश्यसहित मिनी म्याराथन (रोड रनिङ) बाट गरिनेछ । साथै जिल्ला प्रहरी कार्यालय झापाका प्रमुख प्रहरी उपरीक्षक को सहजीकरणमा ‘सुरक्षित डिजिटल समाज निर्माण अभियान’ अन्तर्गत साइबर सचेतना कार्यक्रम समेत आयोजना गरिनेछ ।
सप्ताहभर ट्राफिक नियम पालनासम्बन्धी सचेतना, खाजा तथा अचार बनाउने तालिम, प्राथमिक स्वास्थ्य उपचार सम्बन्धी गोष्ठी, रक्तदान, विपन्न विद्यार्थीलाई स्कुल ब्याग वितरण, उद्योगी–व्यवसायीसँग अभिमुखीकरण तथा तालिमलगायतका कार्यक्रम सञ्चालन हुने जनाइएको छ ।
संस्थाकी महासचिव ले ‘खेलकुद विधामा योगदान, मेचीनगर लेडी जेसीजलाई पाइला–पाइलामा सम्मान’ भन्ने नारासहित आयोजना हुने मिनी म्याराथनमा मेचीनगरभित्रका १६ वर्षमाथिका महिला तथा पुरुष सहभागी हुन पाउने जानकारी दिइन् । दौड मेचीनगर–६ नकलबन्दाबाट भट्टराई चोकसम्म करिब ३ किलोमिटर दूरीमा हुनेछ ।
प्रतियोगितामा महिला तथा पुरुषतर्फ पाँचौं स्थानसम्म नगद पुरस्कार प्रदान गरिनेछ । प्रथम हुनेले १० हजार १ सय रुपैयाँ प्राप्त गर्नेछन् भने दोस्रोदेखि सान्त्वनासम्म क्रमशः ५ हजार १ सय, ३ हजार १ सय, २ हजार १ सय, १ हजार १ सय र १ हजार १ सय रुपैयाँसहित प्रमाणपत्र पाउनेछन् ।
जेसीज विक अन्तर्गत रक्तदान कार्यक्रम काँकरभिट्टास्थित हनुमान मन्दिर परिसरमा आयोजना गरिनेछ भने काँकरभिट्टा बहुमुखी क्याम्पसमा प्राथमिक स्वास्थ्य उपचारसम्बन्धी जनचेतनामूलक कार्यक्रम राखिएको छ । यस्तै, मेचीनगर–७ स्थित लक्ष्मी आधारभूत विद्यालयका विपन्न विद्यार्थीलाई स्कुल ब्याग वितरण गरिने कार्यक्रम पनि समावेश गरिएको छ ।
सप्ताहको अन्तिम दिन युवा तथा समुदाय लक्षित साइबर सचेतना कार्यक्रम आयोजना गरिनेछ । कार्यक्रम सम्पन्न गर्न करिब दुई लाख रुपैयाँ खर्च लाग्ने अनुमान गरिएको छ । उक्त रकम स्थानीय सरकार तथा विभिन्न संघसंस्थाको सहयोगबाट जुटाइने अध्यक्ष प्रधानले बताइन् ।
