गुलाबी फूलले ढाकिएको सतिघट्टा : सामाजिक सञ्जालबाट चर्चामा आएको झापाको नयाँ पर्यटकीय गन्तव्य
डम्बर बिश्वकर्मा
पूर्वी नेपालको शान्त वातावरणबीच फैलिएको सतिघट्टा चिया बगान यतिबेला गुलाबी फूलका कारण चर्चाको केन्द्र बनेको छ। हरियो चिया बगानमाथि ढकमक्क फुलेका गुलाबी फूलहरूले क्षेत्रलाई आकर्षक बनाएपछि यहाँ आन्तरिक पर्यटकहरूको भीड दिनप्रतिदिन बढ्न थालेको हो।
विशेषगरी टिकटक, फेसबुक रिल्स र इन्स्टाग्राममा यहाँका दृश्यहरू भाइरल बनेसँगै देशका विभिन्न स्थानबाट युवायुवती, परिवार र प्रकृतिप्रेमीहरू सतिघट्टा पुग्न थालेका छन्। बिहानदेखि साँझसम्म बगान क्षेत्रमा फोटो खिच्ने, भिडियो बनाउने र प्राकृतिक सौन्दर्यसँग रमाउनेहरूको चहलपहल देख्न सकिन्छ।
काँकरभिट्टाबाट करिब साढे तीन किलोमिटर दूरीमा रहेको यो स्थान अहिले छोटो समयमै झापाको चर्चित ‘फोटो डेस्टिनेसन’ बन्न सफल भएको छ। हरियो चियाका बोट र माथिबाट झरेझैँ देखिने गुलाबी फूलहरूको दृश्यले आगन्तुकहरूलाई लोभ्याउने गरेको छ।
स्थानीयले “गुलाबी शिरीष” भनेर चिन्ने यी फूलहरू वास्तवमा पिंक क्यासिया प्रजातिका रुख भएको जानकारहरू बताउँछन्। फूल फुल्ने मौसमसँगै बगानको दृश्य झन् आकर्षक बनेपछि यहाँ आउने पर्यटकको संख्या उल्लेखनीय रूपमा बढेको हो।
तर बढ्दो भीडसँगै फोहोर व्यवस्थापन चुनौती बन्दै गएको छ। कतिपय पर्यटकहरूले प्लास्टिक, पानीका बोतल र खानेकुराका खोल जथाभाबी फाल्दा बगान क्षेत्रको सौन्दर्यमा असर पर्न थालेको स्थानीयको गुनासो छ।
स्थानीयवासीहरूले सतिघट्टाको प्राकृतिक सौन्दर्य जोगाउन सबैलाई जिम्मेवार बन्न आग्रह गरेका छन्। “प्रकृतिलाई माया गरौँ, फोहोर नगरौँ” भन्ने सन्देशसहित अहिले यहाँ सरसफाइप्रति सचेतना बढाउन थालिएको छ।
प्राकृतिक सौन्दर्य, शान्त वातावरण र गुलाबी फूलको अनुपम दृश्यका कारण मेचीनगर को सतिघट्टा चिया बगान पूर्वी नेपालको नयाँ आकर्षक पर्यटकीय गन्तव्यका रूपमा स्थापित हुँदै गएको छ।
