अनलाइन सट्टाबाजीमा संलग्न दुई जना पक्राउ

झापा, बैशाख २८ । झापाको बिर्तामोडबाट प्रहरीले अनलाइन सट्टाबाजीमा संलग्न रहेको आशंकामा दुई जनालाई नियन्त्रणमा लिएको छ।

आइतवार साँझ ६ बजे जिल्ला प्रहरी कार्यालय झापा र इलाका प्रहरी कार्यालय अनारमनीको संयुक्त प्रहरी टोलीले उनीहरूलाई पक्राउ गरेको हो।

पक्राउ पर्नेहरूमा मेचीनगर नगरपालिका–१० का २७ वर्षीय विपिन गिरी र बिर्तामोड नगरपालिका–६ का ३६ वर्षीय भुवन मेचे रहेका छन्। गिरीलाई बिर्तामोड–५ स्थित गो सिक्स्टीनाइन क्याफे र मेचेलाई बिर्तामोड–४ स्थित रेडहट चिल्लीबाट नियन्त्रणमा लिइएको हो।

पक्राउ परेका दुवै जनालाई आज जिल्ला अदालत झापाबाट सट्टाबाजी सम्बन्धी कसूरमा २ दिनको म्याद थप गरी आवश्यक कानुनी प्रक्रिया अगाडि बढाइएको जिल्ला प्रहरी कार्यालयले जनाएको छ ।