२१ दिनदेखि कुवेतमा मनिषको शव अलपत्र: दूतावासको ढिलाइले परिवार पीडामा
मेचीनगर, झापा।
वैदेशिक रोजगारीका लागि कुवेत पुगेका झापा, मेचीनगरका युवा मनिष दर्जीको मृत्यु भएको २१ दिन बितिसक्दा पनि शव नेपाल ल्याउन सकिएको छैन। कुवेतको एक प्रतिष्ठित क्लिनिङ कम्पनीमा कार्यरत मनिषले आफ्नै क्याम्पमा आत्महत्या गरेको बताइएको छ।
कम्पनीले आवश्यक प्रक्रिया पूरा गरिसकेको बताए पनि कुवेतस्थित नेपाली दूतावासको उदासिनताका कारण शव नेपाल पठाउन ढिलाइ भएको परिवारको गुनासो छ। मनिषकी आमा अन्जु राई दर्जीले दूतावासमा बारम्बार सम्पर्क गर्दा पनि “अर्को हप्ता” भन्दै टारिएको र पछिल्लो समय मे १५ अघि सम्भव नहुने जवाफ आएको बताउनुभयो।
दुई वर्षअघि मात्र श्रीमान् गुमाएकी अन्जु छोराको शव पर्खेर बसिरहेकी छिन्। एनआरएनए कुवेत र स्थानीय सामाजिक संस्थाहरूले यसबारे चासो देखाउनुपर्ने र राज्यले विपन्न श्रमिकको शव स्वदेश फर्काउन जिम्मेवारीपूर्ण भूमिका खेल्नुपर्ने माग उठेको छ। रेमिट्यान्सले देश धान्ने श्रमिकको मृत्युपछि शव बुझ्न पनि हप्तौँ कुर्नुपर्ने अवस्थाले राज्य संयन्त्रको संवेदनहीनता छताछुल्ल पारेको छ।
