दिल्लीमा कक्रोच जनता पार्टीको विशाल प्रदर्शन, शिक्षामन्त्रीको राजीनामा माग
दिल्लीको जन्तर-मन्तरमा कक्रोच जनता पार्टीले भारतका शिक्षामन्त्री धर्मेन्द्र प्रधानको राजीनामा माग गर्दै विशाल प्रदर्शन गरेको छ। पार्टीका संस्थापक अभिजीत दिप्केको नेतृत्वमा शनिबार करिब ५ घण्टासम्म प्रदर्शन भएको हो।
प्रदर्शनमा सहभागी हुन दिप्के शनिबार बिहान मात्र अमेरिकाबाट दिल्ली पुगेका थिए र विमानस्थलबाट सिधै जन्तर-मन्तर पुगेका थिए। विरोध सभालाई सम्बोधन गर्दै उनले शिक्षामन्त्री प्रधानलाई राजीनामा दिन ५ दिनको अल्टिमेटम दिएका छन्। तोकिएको समयभित्र राजीनामा नआए देशभर आन्दोलन विस्तार गर्ने चेतावनी पनि दिएका छन्।
प्रदर्शनमा हजारौँ युवा सहभागी भएको जनाइएको छ। यस कार्यक्रममा सामाजिक अभियन्ता सोनम वाङचुकको समेत सहभागिता रहेको थियो। आगामी शनिबार (जुन १३) फेरि जन्तर-मन्तरमा प्रदर्शन गर्ने पार्टीले जनाएको छ।
नीट (NEET) परीक्षा प्रश्नपत्र बाहिरिएको घटनालाई आधार बनाएर शिक्षामन्त्रीको राजीनामा माग गर्दै यो प्रदर्शन गरिएको हो। नीट भारतको राष्ट्रिय स्तरको मेडिकल प्रवेश परीक्षा हो, जसलाई उत्तीर्ण गरेपछि मात्र मेडिकल क्षेत्रमा अध्ययन सम्भव हुन्छ।
सुरक्षा व्यवस्थालाई ध्यानमा राख्दै दिल्लीमा कडा सुरक्षा व्यवस्था गरिएको भारतीय सञ्चारमाध्यमले जनाएका छन्।
