किशोर क्षेत्रीको टिम मैदानमा, समावेशी प्यानल सार्वजनिक
धुलाबारी, २० वैशाख । मेची उद्योग वाणिज्य संघको आगामी वैशाख २६ गते हुने निर्वाचनलाई लक्षित गर्दै चुनावी माहोल दिनदिनै तातिँदै गएको छ। यही क्रममाआज धुलाबारीमा आयोजित पत्रकार सम्मेलनमार्फत किशोर क्षेत्री (कपिल) नेतृत्वको समूहले आफ्नो सम्पूर्ण उम्मेद्वार टोली सार्वजनिक गरेको छ।
“समावेशी व्यवसायिक प्यानल” नाम दिइएको यस समूहले व्यवसायीहरूको साझा हित, पारदर्शिता र सक्रिय नेतृत्वको प्रतिबद्धतासहित चुनावी मैदानमा उत्रिएको जनाएको छ। अध्यक्ष पदमा किशोर क्षेत्री (कपिल) उम्मेद्वार रहेका छन् भने बरिष्ठ उपाध्यक्षमा भुमी पौडेल, उद्योग उपाध्यक्षमा हरि कोईराला, वाणिज्य उपाध्यक्षमा सन्तोस खवास, महिला उपाध्यक्षमा सुन्दरी श्रेष्ठ र महासचिवमा ध्रुव कनाललाई अघि सारिएको छ।
त्यस्तै कार्यसमिति सदस्यमा आशिष संग्रौला, आशिष श्राफ, अर्जुन तिवारी, राजेश बंशल, तारा श्रेष्ठ, गोपी गौतम, प्रबल केसी क्षेत्री र बिनोद बानियाँ उम्मेद्वार रहेका छन्। महिला सदस्यतर्फ कृष्ण कुमारी प्रसाई (कल्पना) र चम्पा नेम्वाङ पनि प्रतिस्पर्धामा रहने घोषणा गरिएको छ। महासचिवका उम्मेद्वार ध्रुव कनालले प्यानल सार्वजनिक गर्दै व्यवसायीको हक–हितलाई केन्द्रमा राखेर अघि बढ्ने स्पष्ट प्रतिबद्धता जनाए। उनले संघलाई अझ सक्रिय, उत्तरदायी र व्यवसायमैत्री बनाउने लक्ष्य रहेको बताए।
यसअघि नै खेमराज प्रसाई नेतृत्वको अर्को समूहले पनि उम्मेद्वार घोषणा गरिसकेको अवस्थामा चुनावी प्रतिस्पर्धा झन् रोचक बनेको छ। संघमा कुल २११५ मतदाता सदस्य रहेका छन्, जसले आगामी नेतृत्व चयन गर्नेछन्। निर्वाचन कार्यतालिका अनुसार आज वैशाख २० गते दिउँसो १२ बजेदेखि अपराह्न ४ बजेसम्म उम्मेद्वार मनोनयन दर्ताको समय तोकिएको छ। अब केही दिनमै व्यवसायीहरूको रोजाइमा कसले बाजी मार्ला भन्ने चासो र उत्सुकता चुलिँदै गएको छ।
