झापाको बिर्तामोडमा दर्दनाक घटना : खुकुरी प्रहारबाट आमाछोरी घाइते
झापा । झापाको बिर्तामोडमा घरेलु विवादले उग्र रूप लिँदा आमाछोरीमाथि खुकुरी प्रहार भएको छ। शुक्रबार बिहान करिब १०ः३० बजे बिर्तामोड नगरपालिका–१ वरपीपलमा भएको घटनाले स्थानीयवासीलाई स्तब्ध बनाएको छ।
प्रहरीका अनुसार ३६ वर्षीय बुद्धिलाल मुर्मुले घरायसी विवादका क्रममा आफ्नी श्रीमती ३५ वर्षीया मला मर्डी र १५ वर्षीया छोरी विनीता मर्डीमाथि धारिलो हतियार खुकुरी प्रहार गरेका हुन्। अचानक भएको आक्रमणबाट आमा–छोरी दुवै गम्भीर रूपमा घाइते भएका थिए।
घाइते दुवैलाई तत्काल उद्धार गरी बिर्तासिटी अस्पतालमा उपचारका लागि भर्ना गरिएको प्रहरीले जनाएको छ। अस्पताल स्रोतका अनुसार उनीहरूको अवस्था मध्यम रहेको छ।
घटनापछि आरोपी बुद्धिलाल फरार भएका छन्। इलाका प्रहरी कार्यालय अनारमनीबाट खटिएको प्रहरी टोलीले घटनास्थलबाट प्रयोग गरिएको खुकुरी बरामद गरेको छ भने फरार आरोपीको खोजी तीव्र बनाइएको जनाएको छ।
घटनाबारे थप अनुसन्धान भइरहेको प्रहरीले जनाएको छ।
