भारतीय अवरोधपछि झापाका चिया उद्योग आजदेखि बन्द
३ असार, झापा – भारतीय चिया बोर्डले नेपाली चिया निर्यातमा लगाएको अवरोध हटाउन पहल नभएको भन्दै झापाका चिया उद्योग र बगानहरू बिहीबारदेखि बन्द हुने भएका छन्।
नेपाल चिया उत्पादक संघले पत्रकार सम्मेलन गरी निर्यात रोकिँदा उद्योग, किसान र श्रमिक सबै प्रभावित भएकाले बाध्य भएर उद्योग तथा बगान बन्द गर्नुपरेको जनाएको छ। भारतले मे १ देखि लागू गरेको नयाँ गुणस्तर परीक्षण मापदण्डका कारण नेपाली चिया निर्यात अवरुद्ध भएको उद्योगीहरूको भनाइ छ।
झापामा वार्षिक १२–१४ अर्ब रुपैयाँ बराबरको चिया कारोबार हुने र पाँच अर्बभन्दा बढीको चिया भारत निर्यात हुने गरेको छ। निर्यात रोकिएपछि उद्योगमा चिया थन्किएको, किसानलाई भुक्तानी दिन समस्या भएको तथा हजारौं श्रमिकको रोजगारी प्रभावित भएको व्यवसायीहरूले बताएका छन्।
उद्योगीहरूले भारतले ‘स्ट्यान्डर्ड अपरेटिङ प्रोसिजर’ का नाममा नेपाली चियामाथि अघोषित नाकाबन्दी गरेको आरोप लगाएका छन्। समस्या समाधानका लागि नेपाल सरकार र भारतसँग तत्काल कूटनीतिक पहल गर्न उनीहरूको माग छ।
